2018 Jeugboerebroedspaar Lis Peulen en Mees Janssen

In Café Zaal “de Paerssjtal” kwaam op zaoterdig 3 fibberwari ’t 8e Jeugboerebroedspaar van Ruiver-Óffebèk op de klanke van häör eige kinjerversie van “Óffebèk blief Óffebèk” ónger de hoeëge Hood oet.

Veur presentere uch ’t jeugboerebroedspaar 2018 Lis Peulen en Mees Janssen.

’t Bruudje Lis is ut jongste thoes en is 9 jaor en haet 1 broor Sjuul.
Lis haet ’t vastelaovesviere van zien elders doorgekreege. Lis zien pap en mam William en Anja zin in 2006 boerebroedspaar gewaes, in 2015 zin ze getuige gewaes van ut Broedspaar Richard en Dorianne. Det vonj Lis al helemaol geweldig en zoog zichzelf al as jeugdboerebroedspaar. William is in 1989 aug nog jeugdprins gewaes van Óffebèk. Dus Lis haet ut vastelaovend viere neet van eine vraemde.

Lis zien paetoom Leon is de boerebroedegom van dit jaor. Lis vinjt ut geweldig om naeve zien paetoom op de buhne te sjtaon.

Lis zit in groep 5a van Basissjoeël de Meander biej juffrouw Sylvia en geit heel gaer nao sjool.

Lis en Lieke zitte samen op volleybal biej Revoc/vcb jeugd CMV 3.3 en hubbe ein geweldig team met vriendinnetjes. Lis en Lieke zin hele goeie vriendinnetjes want ze doon aug nog paerdrieje samen in Kessel biej manege Het Ros. Lis en Lieke geniete der heel erg van veural as ze galoples hubbe. Lis en Lieke wille ut leefste elke waek biej mekaar logeren, aug as det de elders neet good oetkumpt.

Lieke is aug ut jongste thoes in het gezin. Elders zin Roel en Ellen.. Lieke haet 1 broor Ryan. Pap Roel en mam Ellen viere aug gaer vastelaovendj en gaon den mit vrunj op stap. De opa en oma van Lieke hubbe jaore mitgedaon met de optocht in Belfeld. Dus auch Lieke is ein echte vastelaovendj vierder. Lieke zien broor Ryan is in 2016 getuige gewaes van jeugdboerebroedspaar Marijn en Ivan. Lieke haet toen al kenne aafkieke hoe det geit om getuige te zin. Wiej Lis Lieke as getuige vroog waas Lieke geliek enthousiast. Lieke haet aug al ein paar keer mitgedaon met de liedjesmiddig en haet aug dit jaor weer ein eigen nummer. Daormit is Lieke nao de halve finale gewaes. Op de buhne staon vindjt Lieke geweldig.

Lieke zit in groep 6b van Basisjoeel de Meander biej juffrouw Leonie en juffrouw Linda en geit aug gaer nao sjool.

De broedegom Mees is de jóngste telg van Geert en Miranda Janssen van de Cor Janssensjtraot in Óffebek. Mees is 10 jaor en is ’t breurke van Rens en Juul.  ’t Vastelaovesviere is Mees met de paplaepel ingegaeve. Zien zus Juul is dit jaor adjudant bie de jeug raod van ellef van Óffebék, zien vader Geert waas in 1984 jeugprins in Óffebèk en in 2005 adjudant van prins Coen I. Mees ziene opa Coen waas in 1980 adjudant van prins Jan IV en ziene paetome Mario waas in 2007 adjudant bie de Kwas in Venlo-zuid.

Mees zit same met Kevin in groep 7b van Basissjoeël de Meander bie meneer Mart en dao doon ze allebei erg good häör bes.

Same met Kevin zit Mees bie Jóng Nederlandj, en ouch bie de jeug raod van ellef, al höbbe ze deze vastelaovend effe anger bezighede. Mees handjbalt in de E1 van HV Hercules  ’81 en hae sjpeelt ouch nag gaer piano. Boete sjpele met zien vriendjes en de buurt ónveilig make duit hae ouch gaer.

Getuge Kevin is zoon van Peter en Wendy Peulen en breurke van Owen van de Keulsewaeg. 

Kevin is 11 jaor en voetbalt oppe Ruiver in de D4. As verdere hobby’s haet d’r Jong Nederland, PlayStation en boete ravotte met zien vriendjes.

Ouch Kevin is  ‘t vastelaovend viere met de paplaepel ingegaeve. Samen met zien pap en mam is hae op minnig vastelaovendsbal te vinje. Vreuger leep ziene pap al samen met ome Jan, de sjilder,Peeters met in de optochte. Kevin zien opa en oma, Huub en Fien Boots zien jaorelang lid gewaes van de boerebroelof. Dus toen Mees um vraog om ziene getuige te waere waas t geliek volmondig jao.