2017 Jeugboerebroedspaar Ruth Denessen en Bo Boots

In Café Zaal “de Paerssjtal” kwaam op zaoterdig 18 fibberwari ’t 7e Jeugboerebroedspaar van Ruiver-Óffebèk op de klanke van häör eige kinjerversie van “Óffebèk blief Óffebèk” ónger de hoeëge Hood oet.

.
Veur presentere uch ’t jeugboerebroedspaar 2017 Ruth Denessen en Bo Boots.


’t Bruudje Ruth is de dochter van Hans en Manon van Denessen van de Hoendercamp en getuge Jerre is oet ’t zelfde nest. In dit nest woeëne ouch nag 2 groeëte zusse, Jeanne en Judith, die op ‘t punt van oetvleege sjtaon. Ruth is 10 jaor en Jerre is 8 jaor.
Vief jaor geleje verhoesde ze van Óffebèk nao ‘Oppe Ruiver’. … ach zegke Ruth en Jerre: “.. Ruiver.. Óffebèk… veur ós is ’t allemaol ’t zelfde, allemaol Windjbuujelriek!
Ein groeët gezellig dörp. Gezellig det veur dees biezónjere 6×11 vastelaovend met z’n alle in Óffebèk, in de tent en euveral moge met make”

.
De broedegom Bo en de broedsjóng Cheng zien van Patrick en Helga Boots vanne Lambertusdijk.
Bo is 10 jaor en groeëte broer van Cheng dae 8 jaor is. Bie Bo zit ‘t vastelaovend viere al vreug in ‘t
blood. Toen hae in 2010 as peuter van China nao Nederland verhoesde sjting hae ‘ne maond later al vastelaovend te viere inne Paerssjtal.
As hae den nao hoes mós waar ’t altied baoke. Bo goof de leefde veur de vastelaovend ouch door aan zien breurke Cheng dao in 2012 op vastelaovesdinsdig aan kwaam in Nederland.
Allebei de jónges höbbe d’r zin in óm d’r dit jaor ’n groeët fieës van te make.
Getuge Lenneke is de dochter van Ron en Liesbeth Ligthart, en is gebaore op de Hubert Ummelssjtraot in Óffebèk. Lenneke is 10 jaor en zusje van groeëte zus Eline. Lenneke is gek van sjporte, lekker väól bewaege, gitaar sjpele en danse, kortom, alle ingredieënte veur ‘ne sjoeëne vanstelaovend zien aanwezig.
Laot dus de sjpas maar sjnel beginne!!
Bo en Ruth vinje ‘t geweldig det ze dit jaor jeugboerebroedspaar moge zien. Det doon ze natuurlijk
hartstjikke gaer same met vriendinnetje Lenneke, getuge van Ruth en vriendje Jerre, getuge van Bo.

Cheng is de broedsjóng en sjpringk dees daag gezellig mèt.

Alle vief gaon ze vief daag in de waek mit väól plezeer nao sjoel, de Triolier! Ruth en Lenneke zitte
same in de wereldgroep (groep 7/8) bie juf Angèle. Bo en Jerre zitte same in de schatkist (groep 5/6) bie juf Rianne en stagiaire Martine.

Bo en Jerre voetballe in häöre vrieje tied.. Jerre bie de F1 van Ruiver en Bo bie de E3 van SC Leeuwen.

Ruth en Lenneke sjpele same gitaar, volleyen in ‘t zelfde team.. Ruth sjpeelt ouch nag toniel bie Puur
Theater en Lenneke danst bie Nickey’s Dansstudio. Naeve alle hobbies en sjoel haaje ze allemaol
nag genóg tied euver óm te sjpele, logere, en nag väöl mier gezellige dinge te doon.